Oranjestad – Manera cu a wordo anuncia recientemente durante e discurso di Ursell M. Arends na Universidad di Aruba, Aruba Timeshare Association a duna e universidad tur informacion di e proceso di aplicacion pa e Caribbean Hotel & Toursim Association’s Education Foundation Scholarship funds. A traves di aña, e miembronan di ATSA na Aruba continuamente a apoya e proceso di aplicacion di CHTA Education Foundation Scholarship. E nivel di interes aña pasa tabata hopi halto y e fundacion a screen y evalua 90 candidato. Cu e apoyo continuo di e miembronan, nan ta anticipa un nivel di interes similar e aña aki. Desde awo e proceso di apliacion ta habri y e studiantenan interesa por contacta Jo-Anne Croes di FHTMS di Universidad di Aruba pa mas informacion. CHTAEF a wordo estableci na 1986 como un organisacion independiente 501 (c) 3, liber di paga belasting. Su mandato ta pa mehora y eleva e calidad y profesionalismo di e industria hotelero y turistico den Caribe a traves di educacion y training. CHTAEF ta un di e programanan di caridad mas grandi di e industria hotelero den Caribe, ya cu nan a recauda y otorga mas di 2 miyon dollar na beca y ta duna aplicantenan cu ta demostra un compromiso fuerte cu e industria hotelero y turistico den region. E becanan ta wordo otorga na solicitantenan cu ta atende institucionnan di turismo y hospitalidad rond di mundo cu ta acredita, y conhuntamente cu institucionnan academico manera Johnson & Wales University, Monroe College y Florida International University cu ta brinda becanan adicional na studiantenan eligibel pa un beca di CHTAEF.
CHTAEF tambe ta financia programanan di certificacion y acreditacion pa profesionalnan estableci di e industria regional. Hunto cu Caribbean Hotel & Tourism Association, e programanan di certificacion ta bezig ta wordo refina, reconstrui y financia pa apoya e obhetivo principal di e fundacion, cu ta eleva continuamente e profesionalismo di e industria. E cursonan mas cortico aki ta duna resultado inmediatamente y concreto pa e industria, debi na e caracter specifico y personalisa di e curso. Mas informacion over di e programanan di credencializacion lo continua y ATSA ta comprometi na e distribuimento di e informacion. Recientemente durante e “Second Academic Economic Forum” cu a wordo teni na Universidad di Aruba, decano Wardlaw a confirma cu solamente 10% di studiantenan universitario ta dispuesto pa traha den turismo, principalmente debi na e oranan largo incluyendo fin di siman y dianan di fiesta.
E nocion percibi ta di gran preocupacion pa e industria local, y esey a empuha ATSA pa duna oportunidadnan di beca pa studiantenan di Universidad di Aruba, pa nan por haya un manera pa canalisa nan curiosidad, talento, energia y creatividad, pa descubri con pa innova e industria di vacation ownership pa asina e segmento eynan di Aruba por permanece fuerte pa 40 aña mas. Studiantenan interesa y encurasha por manda nan aplicacion prome cu 15 di april.
